دڵم ئەتوا
دڵم ئەتوا دووارە بۊچکا بووم
چەنە رێواس تورت وتورش راخێ
گوڵاڵەێ بووم بدرەوشم ڤە سێوری
ڤە سینە مەخمەڵین سینە باخێ
دڵم ئەتوا گ ڤە ڤیر ڤەرینەیل۱
دەست بگرم , بچیمە نا کۊچەیل
دووارە بۊمنە دو نوقڵ بۊچک
ڤە نوو شیرن بکەیمن کام کۊچەیل
دڵم ئەتوا گ چاو گوڵ چنیمان
ڤە نوو ڤە نام خێڵ،ئاوازە بگرێ
تو دامان بگری و م گوڵچنی کەم
ئەنامەت بوو گوڵەیل تازە بگرێ
چە بووشم گ تو خوەت جووش وەهاری
گوڵەیلە عەتره دامان تو خەێوشن
چەم و چیم و چیا بۊنن چەوەیلت
چلەێ کل بوو،هەنی۲ ڤە بەز بەێوشن۳
چیە کوو گشتێ ئەو رووژەیل شادە
گ دونیامان پڕە بەێوش و هەنەک۴ بی
کووە ئاوایمان کەل نەیو چۊ ئیسە
دڵ بۊچک کەڵنگمان بێ کەڵەک بی
م هەر روو ڤە کل ناز چەوەیلت
دڵم ژربان ڤە خوڵم۵ عاشقی بی
تو گژنیژە عەرەخ۶ ڤە نەخش تێوڵت
قراو۷ شەرمە هوڵم عاشقی بی
دڵم ئەتوا گ دۊرەی قرم و قاڵە
ڤە نام عەتر گیسەیل تو گوم بووم
ڤە نا کۊچەتان کل بووم و هەر روو
ڤە مێمانی مکیسەیل تو گوم بووم
۱۳۹٤/٥/۲۳
_________________________________________
۱-ڤەرینەیل= گذشته ها
۲-هەنی= هنوز
۳-بەێوش= شادی
۴-هەنەک=شوخی، مزاح
۵-خوڵم= به هم زدن
۶-گژنیژە عەرەخ=قطرات عرق
۷-قراو= شبنم
مفید بود واقعا برام ، اینجارو تو گوشیم سیو میکنم دوباره میام سر میزنم بهتون ،،، ممنون