کات شەیدائی
ئاسمان لێڵ و زەمین رەش پووش و گیژ
دەس کوڵ و ئاماژە بەرز و رێ دریژ
دەرڤەنەیل۱ بێ دەنگ و تاشەیل تێژ
سینەێ سانەیل سەخت خوەر برێژ۲
رێ دریژ و چەفت و چێڵ و پڕ مژە
شەو پڕە دەێدام و غووڵ خۊن مژە
کێوەسان پڕ ڤە چریکە مردێە
ئاسمان سینەێ رەنگ خۊن گردێە
رەنگ شەو رشیاس و گازارە۳ بەساس
گورزە دەس دەێدام تاریکی ڤساس
گەرد شاخەیلێ زەمین شەن کردێە
رێ ڤه رێوارەیل خوەر بەن کردێە
٭٭٭٭٭٭٭٭٭٭٭٭
شاخەوان ئی چیا بەرزە منم
پشت هەرچێ ترسە ڤەێرە ئەشگنم
شەو چراخ رێمە نۊر یەکیەتی
نیزکم ڤە شار دۊر یەکیەتی
ئەێ رەفیق رێ دەست بەێ ڤە دەسم
یەکیەتی دەرمان دەردە گشکەسم
هەڵسە وریا۴ بوو ، جی خافڵ بین نیە
کات۵ شەیدائیە ، کات شین نیە
مشت قورس تو پڕە ئازادیە
تێوم ئازادی بەرێ ئابادیە
دەس ڤە دەس یەک بەیم و رێ بگریمە شاو
تا بەێانی لیسک۶ خوەر بۊنیمە چاو
۱۳۹٦/۹/۱۷
---------------------------------------------
۱-دەرڤەن= دره
۲-خوەربرێژ= آفتاب سوخته،برشته
۳-گازارە= ضخامت
۴-وریا= هشیار
۵-کات= وقت،زمان
